Alla Itolae Nusa 25
Abrahame ikai suike kai bina sae me, eni nane Ketura.
Eleki bina mere iruele kwetela ete Abrahame. Kwetela meru: Simrane, Yoksane, Medane, Midiane, Isibake, kai Sua.
Yoksane eni nanae kena Seba kai Dedane. Eleki Dedane eni anubuaru kena tamata Asyure, tamata Letuse kai tamata Leume.
Yo Midiane eni nana kena Epa, Epere, Hanoke, Abida kai Eldaa. Sie meru pusuise Abrahame eni anubua bei Ketura.
Masike Abrahame eni taneiaru pusulu uleue Isake,
po kena eri rue sare, iriluke hadia ete eni nanaya rebe bei bina makete lekwe. Eleki iulake esi keu bei eni nanae Isake. Hoko esi keu lopai tapela rebe sapaleuke lemataije sare.
Eleki Abrahame irue eti eni musuna utune esa lesi butu itu lesini lima,
eleki imata lulu upuisi ne. Kena imatare eni buare puti pusu peneka kai intua titinai peneka.
Eleki eni nanae Isake kai Ismaele luasi hnoukeni kena liane benai me Mahpela me Eprone tamata Hete eni ndinu tehaike Mamre. Eprone mere Sohare eni nanae.
Tapele kai liane benai mere isabe bei tamata Hete. Hnouke Abrahame kai eni bina Sara luasi ete mere.
Kena Abrahame imata peneka, Alla Iriluke misete ete eni nanae Isake. Isake irue tehaike prigi rebe esi nane Lahai-Roije.
Meije Ismaele eni anubuaru. Ismaele, Abrahame eni nanae bei Hagare, bina Mesire, Sara eni tamata makerike.
Ismaele eni nanaru betekesi atutu lulu esi musune kena rueleise: Menare Nebayote eleki Kedare, Atbeele, Mipsame,
Misima, Duma, Masa,
Hadate, Tema, Yeture, Napise kai Ketma.
Mere Ismaele eni anaru esi nanaru, lulu esi kotaru kai otoi rebe esi ruekele.
Ismaele irue roma eni musuna utune esa lesi butu telu lesini itu pine imata.
Eni anubuaru esi rue kena otoi me Hawila roma Syure me Mesire esi sapaleuke lemataije sare lori sapleuke Asyure. Esi rue tebikesi bei Abrahame eni anubua maketaru.
Abrahame eni nanae Isake eni anubuaru esi meije:
kena Isake eni musuna butu atare ikai kai Ripka. Ripkare Betuele, tamata Arame bei Padan-Arame eni nanae. Ripka betai kena Labane.
Eleki Isake ikotie loko TUHANE ete eni bina le indote. Hoko TUHANE Ilene loko Isake ikotire hoko Ripka ikeu blublulu.
Po kwetela mpe tibuine esi rupa lomai hoko Ripka ilepa be, “Ele meije hoko mise lesire au mata noma.” Kai itneu TUHANE be le mula pine elemeije?
Eleki TUHANE Ibeteke lokoi be,
“Kwetela me tibuimue esi ono bangsa lua.Bangsa lua esi siri bei tibuimue.
Bangsa sae esi ktili lesi bei bangsa saere,
kai kwetele menare iono tamata makerike ete kwetele mulire.”Eleki kena irue le kwetele, tinai, kwete kleite.
Kwete menare isiri, selui lala kai nanakwalaije mbulu lupe lapu nanuke mbulule, hoko esi ono eni nane Esau.
Eleki kwetele mulire isiri. Balaije kerike Esau tuneije, hoko esi ono eni nane Yakupe. Kena ruele kwetela meru Isake eni musuna butu ne.
Eleki kena kwetela lua meru esi ela peneka, Esau iono tamata maka aklali, kai isuka kena irue me neu, yo Yakupe tamata ndenete kai isuka rue me luma.
Hoko Isake ioki Esau le isuka kane aklaline. Yo Ripka ioki Yakupe.
Eleki kena rebai sae me Yakupe imoae kbue lalakwe, kena mere Esau ileu bei me neu hoko iktili moneka le tiai sene titinai.
Eleki Esau ibeteke loko Yakupe be, “Riluke kbue totonai ete au noma le au tiaku sene titinai.” (Ele mere hoko esi kotie Esau eni nane Edome).
Po Yakupe ibeteke loko Esau be, “Yele, po ariluke amu kbasa kwete menare ete au mina.”
Eleki Esau ibeteke loko Yakupe be, “Totonai au mata neka le tiaku sene kuate hoko kbasa kwete mena mere eono misete saisa ete aure?”
Eleki Yakupe ibeteke lokoi be, “Ala ete au mina.” Eleki ila ete Yakupe kai iriluke eni kbasa kwete menare ete Yakupe.
Eleki Yakupe iriluke roti kai kbue rebe imoale ete Esau. Eleki Esau ikane kai ikinu eleki ikeu. Ele mere hoko Esau inoake kbasa kwete mena mere esi sasaisa mo.